काठमाडौं- चितवनको कलेज अफ मेडिकल साइन्सेज (पुरानो मेडिकल कलेज) टिचिङ अस्पतालमा कार्यरत नर्स र सुरक्षाकर्मीमाथि हातपात भएको छ। आफ्नी आमाको उपचारका क्रममा मृत्युपछि आवेगमा आएका छोराले नर्स तथा सुरक्षाकर्मीमाथि सोमबार हातपात गरेका हुन्।
आइसीयूमा राखी फोक्सोको क्यान्सरको उपचार गराईरहेकी आमाको मृत्युपछि मकवानपुरका रोशन सुनारले आइसीयूमा छिरेर त्यहाँ कार्यरत नर्स जस्मिना श्रेष्ठमाथि हातपात गरेका थिए।
सहकर्मीमाथि आक्रमण भएपछि त्यहाँ कार्यरत चिकित्सक तथा नर्सले उनलाई समाउन खोजेका थिए। तर उम्केर उनी गेटसम्म पुगे। त्यहाँ खटिएका सुरक्षाकर्मीले उनलाई समाउन खोजे तर उनले झोलाबाट धारिलो बस्तु झिकेर हातै काटिदिए।
कलेजका सीईओ डा सुप्रभात श्रेष्ठले अहिले उनलाई प्रहरीको जिम्मा लगाइएको बताए।
उनले उपचाररत बिरामीको अवस्थाका बारेमा अस्पताल र चिकित्सकले नियमित रुपमा बिरामी पक्षलाई जानकारी गराइएको र बाबुले त्यसलाई सहज रुपमा लिए पनि छोरा आवेगमा आएको बताए ।
