काठमाडौं- चिकित्सा शिक्षा आयोगले चिकित्सा शिक्षाको स्नातकोत्तर (पिजी) तहको खुला तर्फको दोस्रो म्याचिङको कार्यक्रम स्थगित गरेको छ। सर्वोच्च अदालतको १२ गतेको अन्तरिम आदेश अनुसार आयोगले १७ गतेदेखि हुने भनिएको म्याचिङ र भर्ना प्रक्रिया स्थगन गरेको हो।
सर्वोच्च अदालतले पिजी तर्फका विद्यार्थीलाई मेरिटको सूचीबाट नहटाउन अन्तरिम आदेश जारी गरेको थियो। चिकित्सा शिक्षा आयोगले गत फागुन ४ र ५ गते मेरिट सूचीबाट हटाउन गरेको निर्णय कार्यान्वयन नर्गन सर्वोच्चले अन्तरिम आदेश जारी गरेको हो।
आयोगले पिजीको एकीकृत प्रवेश परीक्षा दिएका सरकारी तर्फका १६ र खुला तर्फका ३६ जना गरी ५२ जनालाई दुर्गममा काम गरेको गलत विवरण पेस गरेको भन्दै मेरिट लिस्टबाट हटाएको थियो। आयोगले उनीहरुलाई मेरिटको लिस्टबाट हटाएपछि ६ जना उम्मेदवारले आयोगको उक्त निर्णयप्रति असन्तुष्टि जनाउँदै फागुन ९ गते सर्वोच्वमा रिट निवेदन पेस गरेका थिए।
उक्त रिट निवेदनको सुनुवाई गर्दै सर्वोच्चले मेरिट सूचीबाट हटाइएका चिकित्सकको प्रक्रिया अगाडि नबढाउन अन्तरिम आदेश दिएको छ।
