काठमाडौं- सरकारले माग पूरा नगरेको भन्दै नेपाल चिकित्सक संघ मधेस प्रदेश कमिटीले प्रदेशका अस्पताल तथा स्वास्थ्य संस्थामा आकस्मिक बाहेकका सेवा बन्द गर्ने भएको छ।
मधेश प्रदेशका अस्पताल र स्थानीय तह अन्तर्गतका अस्पतालहरुमा खटिएका चिकित्सक तथा स्वास्थ्यकर्मीले ६ महिनादेखि तलब नपाएपछि संघ मधेस प्रदेश कमिटीले मधेस सरकारलाई ७२ घण्टाभित्र तलब उपलब्ध गराउन समय दिएको थियो।
तर संघले दिएको समयभित्र माग पूरा नभएपछि संघले आकस्मिक बाहेकका सेवा बन्द गर्ने घोषणा गरेको हो।
मधेस प्रदेश सरकारले मागलाई गम्भीरतापूर्वक नलिएको भन्दै संघले बिहीबार र शुक्रबा मधेश प्रदेश अन्तर्गतका स्वास्थ्य संस्थामा आकस्मिक बाहेक सेवा बन्द गर्ने निर्णय गरेको विज्ञप्ति मार्फत जानकारी दिएको छ।
‘नेपाल चिकित्सक संघ मधेस प्रदेशद्वारा मधेस प्रदेशको श्रीमान मुख्यमन्त्रीज्यूलाई ध्यानाकर्षण पत्र २०८१/ १२/ १७ गते दिइएको जसमा मधेस प्रदेशको स्थानीय तह अन्तर्गत अस्पतालहरूमा खटाइएको चिकित्सक तथा स्वास्थ्यकर्मीहरूको तलब भुक्तानी नभएको विषयप्रति मधेश प्रदेश सरकारलाई ७२ घण्टाको अल्टिमेटम दिएको थियो। जुन अल्टिमेटमको समय सीमा सकिएको छ’, डा निरज कुमार सिंहले हस्ताक्षर गरेको विज्ञप्तिमा भनिएको छ, ‘मधेस प्रदेश सरकारले गम्भीरतापूर्वक नलिएको हुँदा मधेश प्रदेशस्थित सम्पूर्ण स्वास्थ्य संस्थाहरूमा आकस्मिक सेवा बाहेकका चिकित्सकीय सेवाहरू चैत्र २१ र २२ गतेका दिन बन्द रहनेछ।'
संघले चैत २२ गतेपछि थप आन्दोलनका कार्यक्रमहरू सार्वजनिक गर्ने पनि विज्ञप्ति मार्फत जानकारी दिएको छ।
