काठमाडौं- छात्रवृत्ति करार सेवा अन्तर्गत मधेश प्रदेशका अस्पताल र स्थानीय तह अन्तर्गतका अस्पतालहरुमा खटिएका चिकित्सक तथा स्वास्थ्यकर्मीले ६ महिनादेखि तलब पाएका छैनन्।
प्रदेशका धेरै चिकित्सक तथा स्वास्थ्यकर्मीले तलब नपाएपछि नेपाल चिकित्सक संघले प्रदेश मुख्यमन्त्री कार्यालयदेखि संघीय स्वास्थ्य तथा जनसंख्या मन्त्रालयमा ध्यानकर्षण पत्र बुझाएका छन्।
संघका महासचिव डा सञ्जिब तिवारी र सदस्य डा युविन कुमार यादवले संघीय स्वास्थ्य तथा जनसंख्या मन्त्रालयका सचिव डा विकास देवकोटालाई ज्ञापन पत्र बुझाउँदै कात्तिक महिनादेखिको तुलब उपलब्ध गराउन पहल गरिदिन आग्रह गरेका छन्।
'चालु आर्थिक वर्षको कात्तिक महिनामा नियुक्ति लिएदेखि अहिलेसम्मको तलब भुक्तानी नभएको हुँदा आर्थिक अभाव भई दैनिक जनजीवन चलाउन कष्टकर भइरहेकोले यथाशीघ्र तलब उपलब्ध गराउनका लागि आवश्यक पहल गरिदिनुहुन श्रीमान् सचिवज्यू समक्ष संघ अनुरोध गर्दछ,' महासचिव डा तिवारीले संघका तर्फबाट बुझाएको पत्रमा भनिएको छ।
यसैगरी, मधेश प्रदेश मुख्यमन्त्री कार्यालयमा संघका उपाध्यक्ष तथा मधेश प्रदेश संयोजक डा निरज कुमार सिंहले संघका तर्फबाट ज्ञापन पत्र बुझाएका छन्। उनले बुझाएको ज्ञापन पत्रमा ७२ घण्टाभित्र चिकित्सक तथा स्वास्थ्यकर्मीले तलब नपाएमा आमहड्ताल गर्न बाध्य हुने विषय उल्लेख छ।
