काठमाडौं- स्वास्थ्यखबर हेल्थ अवार्डको एघारौं संस्करण आज (शुक्रबार) हुँदैछ।
काठमाडौंमा प्रदान गरिने स्वास्थ्यखबर हेल्थ अवार्ड ‘दिगो विकासका लक्ष्यहरुः राम्रो स्वास्थ्य र समृद्ध जीवनस्तर’ विषयमा केन्द्रित रहने भएको छ।
नेपालको स्वास्थ्य क्षेत्रमा सेवा प्रवाह, नीतिगत सुधार, अध्ययन अनुसन्धान वा स्वयंसेवा गर्दै आएका डाक्टर, नर्स, पारामेडिक्स, जनस्वाथ्यकर्मी, नीतिगत वकालतकर्ता लगाएतलाई स्वास्थ्यखबर हेल्थ अवार्ड प्रदान गरिनेछ।
अवार्डका लागि अवार्ड छनौट कमिटीले आवश्यक काम सम्पन्न गरिसकेको स्वास्थ्य खबरपत्रिकाका अध्यक्ष अनिल न्यौपानले जानकारी दिए।
अवार्डमार्फत नेपालले दिगो विकासका लक्ष्यहरुको सन्दर्भमा विश्व समुदायसँग गरेको प्रतिबद्धता प्राप्तिका लागि भविष्यका कार्यक्रमहरुमा स्वास्थ्य क्षेत्रलाई प्राथमिकता दिन सरोकारवालाहरुलाई पुनःस्मरण गर्ने मौका जुराउने आशा राखिएको छ।
‘यस वर्षको अवार्डको मुल विषय दिगो विकासका लक्ष्यहरु प्राप्तिमा मिडियासहित सबै क्षेत्रको सहभागिता चाहिन्छ भन्ने तथ्यको गहिरो बोध पनि हो,’ प्रकाशक अनिल न्यौपानेले भने। दिगो विकास लक्ष्यहरु सन् २०१५ मा संयुक्त राष्ट्रसंघका सबै सदस्य राष्ट्रबाट अनुमोदन भई सन् २०३० सम्ममा हासिल गर्ने गरी विश्वव्यापी रुपमा जारी गरिएको थियो।
‘हामी सबैलाई अवगत भएकै तथ्य हो, प्रभावकारी स्वास्थ्य प्रवर्धनबिना दिगो विकासका लक्ष्यहरु प्राप्त हुन सक्दैनन्,’ उनले भने, ‘यो सन्दर्भमा स्वास्थ्य क्षेत्र सुधार र विभेदरहित स्वास्थ्य प्रवर्धनमा राष्ट्रिय तहका सरोकारवालाहरुको ऐक्यबद्धता र प्रतिबद्धता बिना दिगो विकासको लक्ष्यको मुल मर्म बोध गर्न कठिन छ।’
यो अवार्डमार्फत आफूले नीतिगत तहमा काम गर्ने र स्वास्थ्य सेवा प्रवाहको दौरानमा अग्र भागमा रहेका काम गर्ने सबैले नेपाली जनताको स्वास्थ्य र आरोग्यतामा पुर्याएको विशिष्ठ सेवाको पहिचान र सम्मान गर्न चाहेको पनि न्यौपानेले बताए।
दिगो विकासका लक्ष्यहरुको तेस्रो बुँदामा स्वस्थ जीवन र सबैको आरोग्यता प्रवर्धनको विषय समेटिएको छ। यस लक्ष्यमा मातृ स्वास्थ्य, नवजात शिशु, किशोर–किशोरी स्वास्थ्य, सर्ने तथा नसर्ने रोगहरु, सर्वव्यापी स्वास्थ्य पहुँच र गुणस्तर तथा सुलभ स्वास्थ्यमा सबैको पहुँच लगायतका महत्वपूर्ण विषयहरु समेटिएका छन्।
‘दिगो विकासका लक्ष्यहरुमा समेटिएको स्वास्थ्य क्षेत्रको गन्तव्य तथा सूचकहरु कार्यान्वयनमा आएको खण्डमा नेपालका लाखौं व्यक्ति लाभान्वित हुनेछन्,’ न्यौपानेले भने, ‘त्यसैले अब हामीले ढिलाइ नगरी यी लक्ष्यहरुको कार्यान्वयनमा सबै क्षेत्रबाट योगदान गर्नुपर्ने समय आएको छ।’
स्वास्थ्यखबर हेल्थ अवार्ड स्वास्थ्य सेवामा विशिष्ट योगदान पुर्याउने व्यक्ति तथा संस्थालाई सम्मानस्वरुप वार्षिक रुपमा प्रदान गरिँदै आएको छ। अवार्डको लागि नामावली संकलन, छनोट र अन्तिम निर्णयको लागि स्वास्थ्य तथा जनसंख्या मन्त्रालय समेतको सहयोगमा स्वास्थ्य क्षेत्रका विभिन्न संघसंस्थाका प्रतिनिधिहरु सम्मिलित निर्णायक समिति गठन गरिएको थियो। यस अवार्ड नेपालका सरकारी तथा सामुदायिक संस्थाहरुमार्फत वा स्वयंसेवी रुपमा सेवा पुर्याउनेहरुलाई दिइन्छ। नाफामुलक संस्थाहरुलाई अवार्डको दायरामा समेटिएको छैन।
‘अवार्डमार्फत नेपालमा स्वास्थ्य सेवामा सेवा प्रवाह गरिरहनुभएका स्वाथ्यकर्मी तथा नीति–निर्माताहरुलाई थप प्रोत्साहित गर्ने कार्यमा नेपाल सरकार, संयुक्त राष्ट्रसंघ, अन्तर्राष्ट्रिय गैरसरकारी संघसंस्थाहरु तथा अन्तर्राष्ट्रिय समुदायको समेत साथ र स्वामित्व रहनेछ भन्ने विश्वास लिएको छु,’ न्यौपानेले भने।
