काठमाडौं- वीर अस्पतालकी एक नर्स मृत फेला परेकी छिन्। ३४ वर्षीया अनुमा श्रेष्ठ बोहोराटारस्थित प्रेमीको घरमा मृत फेला परेकी हुन्।
प्रहरीको प्रारम्भीक जानकारी अनुसार विवाह गर्न नमानेको भन्दै ती नर्सले युवककै घरमा पुगेर आत्महत्या गरेकी हुन्।
वीर अस्पतालको ग्यास्ट्रो मेडिसिन वार्डको नर्सिङ इन्चार्ज समेत रहेकी ३४ वर्षीय नर्स अनुमा श्रेष्ठले शनिवार केटाकै घरमा गएर आत्महत्या गरेको प्रहरीले जानकारी दिएका छन्।
प्रहरी वृत्त बालाजुका अनुसार ३४ वर्षीय अनुमा श्रेष्ठले आत्महत्या गरिसकेको अवस्थामा बोहोराटारस्थित प्रेमी सुजन ढकालको घरमा शव भेटिएको हो। आत्महत्या गरिसकेको अवस्थामा सुजनका परिवारले प्रहरीलाई खबर गरेको थियो।
नारायणगढमा रहेका मृतक अनुमाको परिवार काठमाडौँ आएपछि शनिवार राती मुचुल्का तयार पारी शव उठाइएको छ।
८औं तहकी वरिष्ठ नर्सिङ अधिकृत अनुमाका प्रेमी भनिएका सुजन ढकाल डाक्टर हुन्। सुजन कोशी अस्पतालमा काम गर्थे।
लामो समय प्रेम सम्बन्धमा रहे पनि विवाह गर्न नमानेको भन्दै उनले आत्महत्या गरेको भन्दै प्रहरीले अनुसन्धान अघि बढाएको छ। ‘शव भेटिएपछि हामीले अनुसन्धान अघि बढाएका छौं’ जिल्ला प्रहरी परिसर काठमाडौंका एसपी तथा प्रवक्ता सिताराम रिजालले भने। प्रहरीले सुसाइड नोट समेत फेला पारेको छ।
*हेडलाइनमा नै आत्महत्या भन्ने शब्द पर्न गएकाले उक्त शब्द हटाउँदै सच्याइएको- सम्पादक
