काठमाडौं - नेपालमा कोरोना भाइरसविरुद्धको खोप आउने क्रम जारी छ। पछिल्लो केही दिनयता नेपालमा धेरै संख्यामा खोप आइरहेको छ। तर खोप आएसँगै सरकारले खोप लगाउने काम भने अगाडि बढाउन सकेको छैन।
सरकारले खोप लगाउने कामलाई तीव्र रुपमा अगाडि नबढाउँदा कोभिडविरुद्धका खोप भण्डारमा थपिँदै गएका छन्। सोमबार साँझसम्मको तथ्यांक अनुसार सरकारसँग कोभिड–१९ विरुद्धको एक करोड २४ लाख ४२ हजार २९९ डोज खोप भण्डारणमा छ।
सरकारले एकै दिन तीन लखाभन्दा बढी नागरिकलाई खोप लगाउन सक्ने बताए पनि पछिल्लो केही दिनयता एक लाख हाराहारीमा मात्र खोप लगाइरहेको अवस्था छ। स्वास्थ्य सेवा विभाग स्रोतका अनुसार खोप लगाउन आवश्यक पर्ने सिरिन्जको समस्या आउने देखिएपछि खोपको दायरालाई तत्कालै फराकिलो नबनाइएको हो।
‘सिरिन्जको अभाव नै भइसहेको अवस्था त छैन,’ विभागका एक कर्मचारीले भने, ‘अहिलेलाई त पुग्ने अवस्था नै छ। तर दाताहरुले दिने भनेको सिरिन्ज समययमा नै नआए अर्को महिनासम्म अभाव हुने संकेत देखिएको छ।’
ती कर्मचारीका अनुसार युनिसेफले ५० लाख र चीनबाट २० लाख सिरिन्ज आउने ढिला भएको हो।
आपूर्ति व्यवस्थापन शाखा प्रमुख सुरेन्द्र चौरासियाका अनुसार सिरिन्जकै कारण खोप लगाउनेको संख्या कमी नभएको बताउँछन्। उनले अहिलेको खोप कार्यक्रमका लागि आवश्यक पर्ने सिरिन्जको अभाव नरहेको पनि जानकारी दिए।
केही दिनमै ५० लाख सिरिन्ज आउने तयारीमा रहेको उनले बताए। यो सहित थप २० लाख, ६ लाख ४८ हजार, ६० लाख सिरिन्जहरु पाइपलाइनमा रहेको उनले जानकारी दिए।
उनले भने, ‘खोप अभाव या सिरिन्ज नभएर खोप अभियान प्रभावित हुँदैन। सिरिन्जहरु हामीले पठाइरहेका छौँ। आउने क्रम पनि जारी छ। त्यसैले सिरिन्जको अभाव छैन। खोप लगाउने संख्या कहिले धेरै त कहिले थोरै हुन्छ।’
कुन खोप कति भण्डारणमा?
चौरसियाका अनुसार भेरोसेल खोपको ७ लाख ४५ हजार ३३१ (एक डोजवाला) र ५ लाख ४ हजार ३० (पाँच डोज वाला) खोप भण्डारणमा छ।
यस्तै, जोन्सन एण्ड जोन्सन २१ लाख ७६ हजार ६५०, अष्ट्राजेनिका १० हजार ९०, कोभिसिल्ड ३३ लाख ७३ हजार ७९०, फाइजर २८८, मोडर्ना २५ लाख ७ हजार १६० डोज खोप भण्डारणमा रहेको उनले बताए।
आज एकै दिन कोभिड १९ विरुद्धको थप ३० लाख ७२ हजार डोज खोप नेपाल भित्रिएपछि भण्डारणमा रहेको खोपको संख्या एक करोड माथि पुगेको छ।
भारतबाट १८ लाख ७० हजार ५०० डोज कोभिसिल्ड र चीनबाट १२ लाख १ हजार ७७८ डोज भेरोसेल खोप नेपाल आएको चौरासियाले बताए। कोभिसिल्ड कोभ्याक्स सुविधा अन्तर्गत र भेरोसेल खोप एसियाली विकास बैंक (एडिबी) को सहुलियत ऋण सहयोगमा खरिदको खोप हो। मौसमी खराबीका कारण त्रिभुवन अन्तर्राष्ट्रिय विमानस्थलबाटै फर्काइएको थियो।
खोप अभियानलाई तीव्रता दिने तयारी
भण्डारणमा खोप पर्याप्त रहेकाले खोप अभियानलाई तीव्रता दिने स्वास्थ्य तथा जनसंख्या मन्त्रालयले जनाएको छ। एकै पटक सबैलाई खोप लगाउँन नमिल्ने भएकाले प्राथमिकीकरण गरेर खोप लगाइने गरेको मन्त्रालयका सहप्रवक्ता डा समीरकुमार अधिकारीले बताए।
उनले भने, ‘जो बाँकी छन्, उहाँहरुलाई प्राथमिकीकरण गरेर खोप लगाउने काम भइरहेको छ। एकै पटक सबैलाई खोप लगाउँदा अन्यौल हुन सक्छ। त्यसैले जिल्ला अनुसार अवस्था अनुसार सबै खोपलाई प्राथमिकीकरण गरेर खोप लगाउँछौ।’
हाल बालबालिकाहरुलाई मात्र खोप लगाइएकाले पनि खोप लगाउनेको संख्या कम देखिएको हुन सक्ने उनले बताए।
