बगदाद- इराकको एक अस्पतालमा भएको आगलागीमा परी कम्तीमा पनि ४१ जनाको ज्यान गएको छ। इराकको दक्षिण प्रान्त धिक्वारमा सो दुर्घटना भएको हो।उक्त अस्पतालमा कोभिड १९का बिरामीहरुको उपचार जारी रहेको थियो। अस्पतालमा सोमबार राति अकस्मात आगो लागेको थियो। सो अस्पताल इराकको राजधानी बगदादबाट करिब ३७५ किलोमीटर टाढा रहेको छ।
विशेषगरी कोभिडका बिरामीहरुको उपचार जारी रहेको सो अस्पतालमा आगो लागेको यहाँका सुरक्षा अधिकारीहरुले जानकारी दिएका छन्। नासियारा शहरको सो अस्पतालमा आगलागी भएको बताइएको छ।
उक्त अस्पतालमा निर्माण गरिएको कोभिड १९ का संक्रमितहरुलाई राखेर उपचार गर्ने क्वारेन्टाइनमा सो आगलागी भएको थियो। त्यसमा परेर ४१जनाको ज्यान नै गएको बताइएको छ भने अरु केही बिरामीहरु घाइते भएका छन्।
अस्पतालमा आगो लागेपछि ठूलो संख्याका अग्नि नियन्त्रकहरु आगो निभाउनका लागि खटाइएको थियो। तर उनीहरुले पनि लामो समयसम्म आगो नियन्त्रणमा लिन नसकेपछि ठूलो क्षति हुन पुगेको बताइएको छ।
इराकी प्रधानमन्त्री मुस्ताफा अल कादिमीले सो आगलागीको कारण र यसले उत्पन्न गर्नसक्ने अवस्थाका बारेमा छलफल गर्न मन्त्रिपरिषदको आकस्मिक बैठक नै बोलाउनुभएको थियो। त्यस्तै इराकको संसदका सभामुखले सोमबार राति ट्वीट गर्दै इराकी संसदको बैठकमा मंगलबार सो आगलागीका बारेमा छलफल गरिने कार्यक्रम बनाइएको जानकारी दिए।
यहाँको प्रहरीले उक्त अस्पताल भवनमा के कति कारणले आगलागी भएको हो भन्ने बारेमा अनुसन्धान थालेको बताएको छ। त्यस आगलागीमा परेर ज्यान जानेमा प्राय बिरामीहरु नै परेका अनुमान गरिएको छ।यस विषयमा अस्पतालले केही बताएको छैन। अस्पतालले सो अस्पताल भवनमा कोभिड १९का संक्रमितहरुको उपचार केन्द्र राखिएको र त्यहाँ कोभिडका मात्र बिरामीको उपचार गर्ने गरिएको जनाएको छ।
रासस
