नयाँ दिल्ली- भारतमा कोरोनाभाइरसबाट दैनिक संक्रमितहरुको संख्यामा फेरि बृद्धि भएको छ। पछिल्ला केही दिन लगातार घट्दै गएकोमा बिहीबार फेरि बृद्धि भएको अधिकारीहरुले जानकारी दिएका छन्।
उनीहरुका अनुसार पछिल्लो २४ घण्टामा भारतमा कोरोनाभाइरसबाट ४५ हजार ८९२ जना नयाँ संक्रमित थपिएका छन्। यसअघि बुधबार एक दिनमा नयाँ संक्रमितको संख्या ४३ हजार ७३३ रहेको विवरण संघीय स्वास्थ्य मन्त्रालयले सार्वजनिक गरेको थियो।
भारतमा अहिले संक्रमित अवस्थामै रहेका संक्रमितहरुको कुल संख्या भने चार लाख ६० हजार ७०४ रहेको मन्त्रालयले जनाएको छ। कुल संक्रमित मध्ये १।५ प्रतिशत मात्रै अहिले संक्रमित अवस्थामा रहेका हुन्। मन्त्रालयका अनुसार पछिल्लो २४ घण्टामा भारतमा ८१७ जनाको कोरोनाभाइरसका कारण मृत्यु भएको छ। योसँगै भारतमा अहिलेसम्म कोरोनाभाइरसका कारण कुल मृतकको संख्या चार लाख पाँच हजार २८ पुगेको छ।
कोरोनाभाइरसको महामारी फैलिएदेखि अहिलेसम्म भारतमा दुई करोड ९८ लाख ४३ हजार ८२५ जना कोरोनाभाइरसबाट संक्रमित भएरपनि अहिले संक्रमणमुक्त भइसकेका छन्। ती मध्ये ४४ हजार २९१ जना पछिल्लो २४ घण्टामा संक्रमणमुक्त भएका हुन।
भारतीय चिकित्सा अनुसन्धान परिषद्ले दिएको जानकारीअनुसार भारतमा अहिलेसम्म ४२ करोड ५२ लाख २५ हजार ८९७ पटक स्वाब परीक्षण गरिएको छ।
रासस
