कोरोना संक्रमण बढ्दै जाँदा योसँग जोडिएका भम्रपूर्ण विषय पनि दिन प्रतिदिन बढिरहेका छन्।
हालै शुरु भएको नेकपाको स्थायी कमिटी बैठकमा सहभागी भएका नेताहरुले कोरोना संक्रमणबाट जोगाउने भन्दै एक प्रकारको कार्ड (जन्तर) घाँटीमा झुन्डाएको दृश्य बाहिरियो। देशको नेतृत्व गरिरहेको पार्टीका जिम्मेवार नेताले नै भम्रपूर्ण विषय अनुशरण गरेपछि जनतामा यसको प्रत्यक्ष प्रभाव पर्छ नै। 'यो जन्तर लगाएपछि कोरोना भाइरस सर्दैन' भन्ने उनीहरुलाई लागेको छ। तर, यसको वास्तविकता भने फरक छ ।
यो जन्तर पार्टीका वरिष्ठ नेता माधवकुमार नेपालले दिएको र यस्ता जन्तरको प्रयोग जापानमा पनि हुने गरेको स्थायी कमिटी सदस्य मुकुन्द न्यौपानेको भनाइ छ।
स्वास्थ्य मन्त्रालयका प्रवक्ता डा जागेश्वर गौतमले यस्ता कार्डमा राखिएको किटनाशक औषधिले स्वास्थ्यमा थप जोखिम पार्ने भन्दै यस्ता भ्रमका पछाडि नलाग्न सबैसँग आग्रह गरेका छन्।
नेपालस्थित विश्व स्वास्थ्य संगठनको कार्यालयका प्रतिनिधि डा जोस भ्यान्देलियरले हालसम्म कोरोनाको उपचारका लागि कुनै पनि औषधि वा खोप पत्ता नलागेको बताए।
विश्वलाई त्रसित बनाएको कोरोना भाइरसको संक्रमणबाट बच्न हरसम्भव प्रयास र उपायको खोजी हुँदैछ। तर हालसम्म कुनै पनि औषधि भने पत्ता लागिसकेको छैन।
कोरोनाको प्रकोपसँगै यसको उपचार र संक्रमण रोक्ने नाममा विश्वका धेरै स्थानमा यस्ता भ्रम फैलिइरहेका छन्। नेकपा नेताहरुले लगाएको कार्डले पनि जनतामा थप भ्रम फैलाएको जनस्वास्थ्य विज्ञहरुको धारणा छ।
नेकपाका नेताहरुले लगाएको उक्त कार्डमा क्लोरिन-डाइअक्साइड रहेको बताइएको छ। कार्डको भित्री भागमा टाँसिएको क्लोरिन डाइअक्साइडले भाइरस मार्छ भनी गलत हल्ला चलाइएको स्वास्थ्य मन्त्रालयले जनाएको छ।
यस्ता कार्ड बनाउने, विदेशबाट ल्याउने र व्यापार गर्दै जनस्वास्थ्यमाथि खेलबाड गर्नेलाई सरकारले कानुनी दायरामा ल्याई कारबाही गर्ने मन्त्रालयका प्रवक्ता डा गौतमले प्रष्ट पारे।
चाइना फार्मास्युटिकल युनिभर्सिटी अन्तर्गत स्कुल अफ फार्मेसीका प्रोफेसर यिन लिफाङका अनुसार बजारमा उपलब्ध डिसइन्फेक्सन कार्डमा क्लोरिन डाइअक्साइडको मात्रा तीनदेखि १५ ग्रामसम्म हुन्छ।
सान्सी युनिभर्सिटीको इन्स्टिच्युट अफ इन्भाइरोमेन्टल साइन्सका निर्देशक डोङ चुआनले यस्ता 'भाइरस डिस्इन्फेक्सन कार्ड' फुटेर वा चुहिएर छाला अथवा पसिनाको सम्पर्कमा आए गम्भीर नकारात्मक असर गर्ने बताएका छन् । त्यस्ता कार्डमा भएको ग्याँस लिक भएमा स्वाशप्रस्वाशमा समेत गम्भीर असर गर्छ ।
स्वास्थ्य मन्त्रालयका प्रवक्ता डा जागेश्वर गौतमले यस्ता जन्तर प्रयोग गर्दा मुटु, फोक्सो, कलेजोलगायतका अंगमा असर गर्ने भन्दै यस्ता कार्डको प्रयोग नगर्न अनुरोध गरे।
