कैलाली- सुदूरपश्चिम प्रदेशमा ११ दिन यता कोरोना भाइरस (कोभिड–१९) का नयाँ संक्रमित देखा परेका छैनन्।
वैशाख १ गते वीरगञ्जमा चिया पसल गर्दै आएकी महिलामा कोरोना संक्रमण भएको पुष्टि भएको थियो। उनी ९ चैतमा लम्की आएकी थिइन्। भुरुवामा आफन्तकहाँ बसेकी उनलाई स्थानीय जनप्रतिनिधिले क्वारेन्टाइनमा राखेका थिए।
उनीसँगै प्रदेशमा कोरोना संक्रमितको संख्या पाँच पुगेको थियो। चैत २२ गते कैलालीको धनगढी उपमहानगरपालिका ५ की महिलामा कोरोना पुष्टि भएपछि नेपालमा कोराना संक्रमण दोस्रो चरणमा प्रवेश गरेको थियो। दुबइबाट चैत ७ गते दिल्ली हुँदै फर्केका अमृत शाहीकी भाउजुमा कोरोना संक्रमण देखिएको थियो।
वैशाख १ गते वीरगञ्जबाट फर्केकी महिलामा कोरोना पुष्टि भएपछि प्रदेशमा तीन पुरुष र दुई महिला गरी संक्रमितको संख्या पाँच पुगेको थियो।
तीन डिस्चार्ज, दुई उपचारमा
सुदूरपश्चिम प्रदेशमा कोरोना देखिएका पहिलो व्यक्ति हुन अमृत शाही। उनी वैशाख ९ गते अस्पतालबाट डिस्चार्ज भएका छन्। उनीभन्दा अगाडि चैत २२ मा कोरोना पुष्टि भएका लम्की चुहा नगरपालिकाका युवा वैशाख ७ गते डिस्चार्ज भएका थिए। बैशाख १० गतेमात्र अर्का युवा कञ्चनपुरको वेदकोट नगरपालिकाका युवा डिस्चार्ज भएका छन्। यसरी प्रदेशमा पाँच संक्रमित रहेकोमा दुई महिला उपचारमा रहेका छन्।
सेती प्रादेशिक अस्पतालले दुवै महिलाको अवस्था सामान्य रहेको जनाएको छ।
सेती प्रादेशिक अस्पतालमा हालसम्म ३८ शंकास्पद व्यक्तिको उपचार भएको जनाइएको छ । २४ घण्टा यता नयाँ शंकास्पद व्यक्तिहरु नरहेको जानकारी दिएको छ ।
प्रदेशमा अहिलेसम्म ९९ जनालाई आइसोलेसनबाट डिस्चार्ज गरिसकिएको छ भने ६ जना आइसोलेसनमा राखिएका छन्। यस्तै, तीन सय २२ स्थानमा छ हजार सात सय २८ बेडको क्वारेन्टाइन सञ्चालनमा छन्। एक सय ८९ महिला र एक हजार पाँच सय ७० पुरुष गरी एक हजार सात सय ५९ जनालाई क्वारेन्टाइनमा राखिएको प्रदेश स्वास्थ्य निर्देशनालयले जनाएको छ।
दश हजारभन्दा बढीको नमुना संकलन
सुदूरपश्चिम प्रदेशमा अहिलेसम्म कोरोना भाइरस संक्रमणको द्रुत परीक्षण (र्यापिड टेस्ट) र पोलिमरेज चेन रियाक्सन (पीसीआर)बाट १० हजार ८ सय ३९ व्यक्तिको नमुना संकलन गरिएको छ।
प्रदेशमा र्यापिड टेष्टमार्फत् आठ हजार दुई सय तीन र पीसीआरबाट दुई हजार तीन सय ३१ व्यक्तिको नमुना संकलन गरिएको छ। र्यापिड टेष्टबाट पाँच जनामा पोजेटिभ देखिएको थियो भने पीसीआरबाट एक जनामा नेगेटिभ देखिएको छ। प्रदेश स्वास्थ्य निर्देशनालयका अनुसार पाँच जनाको पीसीआर रिपोर्ट आउन बाँकी छ। नौ जिल्ला रहेको सुदूरपश्चिम प्रदेशभरिमा १० हजार दुई सय ८२ किट मौज्दात रहेको जनाइएको छ।
थपिए आइसीयू र भेन्टीलेटर
सुदूरपश्चिम प्रदेशका सेती प्रादेशिक अस्पतालमा सघन उपचार कक्ष (आइसीयू) र भेन्टीलेटर तथा महाकाली प्रादेशिक अस्पतालमा भेन्टीलेटर थप गरिएको छ।
कोरोना भाइरस संक्रमित बिरामीको उपचारमा सहजता ल्याउन सेती प्रादेशिक अस्पतालमा पाँच बेडको आइसीयू र एक भेन्टीलेटर थप गरिएको जनाइएको छ। यस्तै महाकाली प्रादेशिक अस्पतालमा एक भेन्टीलेटर थप गरिएको प्रदेश स्वास्थ्य निर्देशनालयले जनाएको छ।
योसँगै प्रदेशको सेती प्रादेशिक अस्पतालमा १० बेडको आइसीयू र महाकालीमा चार बेड गरी १४ वेडको आइसीयू सञ्चालनमा रहेका छन्। धनगढीको निजी अस्पताल नवजीवन र माया मेट्रोमा पाँच–पाँच तथा निसर्गमा ६ बेडका आइसीयू छन्।
यस्तै सेती प्रादेशिकमा छ, महाकालीमा दुई, दार्चुला र डडेल्धुरा अस्पतालमा एक÷एक गरी १० भेन्टीलेटर छन्।
