टोकियो- जापानमा तन्तुमाथि आक्रमण गर्ने नयाँ ब्याक्टेरिया फैलिएको छ। स्ट्रेप्टोकोकल टक्सिक सक सिन्ड्रोम (एसटीएसएस) नाम दिइएको उक्त रोगबाट जुन २ सम्ममा ९७७ जना संक्रमित भइसकेका छन्। गतवर्ष जम्मा ९४१ जनामा यो ब्याक्टेरिया देखिएको जापान टाइम्सले जनाएको छ।
नेशनल इन्सिच्युट अफ इन्फेक्सियस डिजिवका अनुसार यो ब्याक्टेरिया पहिलोपल्ट सन् १९९९ मा पत्ता लागेको थियो। समूह ए स्ट्रेप्टोकोकसले सामान्यतया बच्चाहरूमा घाँटी सुन्निने र दुख्ने बनाउँछ जसलाई 'स्ट्रेप थ्रोट' भनिन्छ, तर केही प्रकारका ब्याक्टेरियाहरूले खुट्टा दुख्ने र सुन्निने, ज्वरो, न्युन रक्तचापलगायतका लक्षणहरू देखाउन सक्छन्।
यसैगरी नेक्रोसिस, श्वासप्रश्वासमा समस्या र विभिन्न अंग फेल गराउनेसम्म देखिएको छ। ५० वर्षभन्दा माथिका व्यक्तिहरू यस रोगको बढी जोखिममा छन्। जापानमा यसवर्ष २५०० जनामा संक्रमण फैलिने र मृत्युदर ३० प्रतिशत हुने टोकियो वुमेन्स मेडिकल युनिभर्सिटीका संक्रामक रोगका प्राध्यापक केन किकुचीले बताएका छन्।
'धेरै जसो मृत्यु ४८ घण्टा भित्र हुन्छ,' किकुचीले भने, 'बिरामीले बिहान खुट्टा सुन्निएको महशुस गर्छन्। दिउँसोसम्म यो घुँडासम्म फैलिन सक्छ र ४८ घण्टा भित्र मृत्यु गराउन सक्छ।'
अन्य देशहरूमा यो ब्याक्टेरियाको प्रकोप देखिएको बताइएको छ। सन् २०२२ को अन्तमा कम्तिमा पाँच युरोपेली राष्ट्रहरूले विश्व स्वास्थ्य संगठनलाई ए स्ट्रेप्टोकोकस (आईजीएएस) देखिएको बताएका थिए।
