काठमाडौं- काठमाडौं महानगर अन्तर्गतका मेडिकल कलेजमा कार्यरत चिकित्सकहरुलाई अन्य अस्पतालमा काम नगर्न काठमाडौं महानगरपालिकाले ध्यानाकर्षण गराएको छ। एक सार्वजनिक सूचना जारी गर्दै मेडिकल कलेजका अस्पतालमा नभेटिने गुनासो आएकाले त्यसो नगर्न भनिएको छ।
सूचनामा उल्लेख छ, 'सर्वसाधारणलाई स्वास्थ्य सेवा समेत प्रवाह गर्ने सर्तमा काठमाडौँ महानगरपालिका क्षेत्रभित्र सञ्चालित शिक्षण संस्थाहरूमा आबद्ध अस्पतालहरूमा स्वास्थ्य सेवा प्राप्त गर्न जाँदा चिकित्सक तथा स्वास्थ्यकर्मीहरू एवं कर्मचारीहरू उपलब्ध नहुने गरेको, सो समयमा अन्यत्र काम गर्ने गरेको, शल्यक्रिया, सिटी स्क्यान, एमआरआई स्क्यान जस्ता सेवाहरूका लागि महिनौसम्म कुर्नुपर्ने भनी सर्वसाधारणहरूको गुनासाहरू दिन प्रतिदिन यस कार्यालयमा बढ्ने गरेको छ।'
राष्ट्रिय चिकित्सा शिक्षा ऐन, २०७५ को दफा ४१ र राष्ट्रिय चिकित्सा शिक्षा नियमावली, २०७७ को नियम ३७ (क) मा चिकित्सा शिक्षा प्रदान गर्ने संस्थाका शिक्षक, प्रशिक्षक तथा कर्मचारीहरूले पालना गर्नुपर्ने आचार संहिता स्मरण गराइएको छ। जहाँ 'आफूलाई खटाएको शिक्षण संस्थामा मात्र काम गर्ने' बाध्यात्मक व्यवस्था रहेको महानगरको भनाइ छ।
'सो कानुनी व्यवस्थाको यथार्थ परिपालना गर्न र गराउन सम्बद्ध व्यक्ति, पदाधिकारी तथा संस्थालाई काठमाडौँ महानगरपालिका सार्वजनिक रूपमा अपिल गर्न चाहन्छ,' सूचनामा भनिएको छ, 'उक्त कानुनी व्यवस्था बमोजिम सर्वसाधारणहरूले अस्पतालहरूबाट सहज रूपमा स्वास्थ्य सेवा प्राप्त गर्न नसकेमा वा विद्यमान कानुनी व्यवस्थाको उल्लङ्घन भएको देखिएमा अनुगमन तथा नियमनको माध्यमबाट प्रचलित कानुनी व्यवस्था बमोजिम गर्ने गराउने व्यहोरा समेत यसै सूचना मार्फत सूचित गरिन्छ।'
