काठमाडौं- भारतीय अभिनेत्री पुनम पाण्डेले आफ्नो पाठेघरको मुखको क्यान्सरबाट मृत्यु भएको भन्दै 'पब्लिसिटी स्टन्ट' गरिन्। उनकै इन्स्टामा मृत्युको खबर उल्लेख हुनु र उनकी म्यानेजरले पुष्टि गर्नुका कारण धेरैले पत्याए। आमसञ्चार माध्यमले पनि समाचार बनाए। तर, दुई दिनपछि पाण्डेले आफू जिउँदै भएको मात्रै 'स्टन्ट' गरेको बताइन्।
आफूले सर्भाइकल क्यान्सरका बारेमा सचेतना फैलाउन उक्त स्टन्ट गरेको स्पष्टिकरण दिइन्। पब्लिसिटीका लागि नग्न अवस्थाको तस्विर समेत सार्वजनिक गर्ने पाण्डेको हर्कतलाई लिएर आलोचना भइरहेको छ। तर, सवै सेलिब्रिटी पाण्डेजस्ता हुँदैनन्। कति यस्ता छन्, जसले साँच्चिकै क्यान्सरसँग मुकाबिला गरेका छन् र अहिले जिवित छन्।
मनिषा कोइराला
नेपाली मूलकी बलिउड अभिनेत्री मनीषा कोइराला पनि क्यान्सरबाट ग्रस्त भएकी अभिनेत्री हुन्। उनको क्यान्सरसँगको युद्धको यात्रा निकै प्रेरणादायी छ।
मनिषालाई सन् २०१२ मा ओवेरियन क्यान्सर भएको थियो। त्यो बेला उनले आफूलाई क्यान्सर भए पनि हरेर नमानी रोगसँग लडेकी थिइन्। उनले क्यान्सर भएको बेला सामाजिक सञ्जालमा निरन्तर आफ्नो स्वास्थ्यको बारेमा अपडेट दिन्थिन्।
केही वर्ष सम्मको निरन्तर उपचारपछि मनिषा ठिक भएकी थिइन्। सन् २०१८ मा उनको क्यान्सरसँगको यात्राको विषयमा रहेको आत्मकथा ‘हिल्डः हाउ क्यान्सर गेभ मि अ न्यु लाइफ’ पुस्तक सार्वजनिक भएको थियो।
महिमा चौधरी
केही दिनअघि बलिउडकी अभिनेत्री महिमा चौधरीले आफूलाई क्यान्सर भएको र अहिले त्यसलाई जित्न सफल भएको बताएकी छिन्। अभिनेता अनुपम खेरसँगको एक भिडियो कुराकानीमा उनले यो सबै सार्वजनिक गरेकी थिइन्।
‘परदेश’ फिल्मकी अभिनेत्री महिमाले आफूले आफूलाई नै चिन्न असहज भइरहेको बताएकी थिइन्। क्यान्सरका कारण सम्पूर्ण कपाल गुमाएर फरक आवरणमा देखिएकी महिमाले आफूले क्यान्सरसँगको चुनौतीपूर्ण युद्धमा अन्ततः विजय हासिल गरेको बताएकी थिइन्।
लीसा राय
अभिनेत्री तगा मोडल लीसा रायलाई सन् २००९ मा मल्टिपल मायलोमा देखिएको थियो। बोनम्यारोका प्लाज्मा सेल्सका क्यान्सर भएको उनले सन् २००९ को क्रिसमसमा थाहा पाएकी थिइन्। उनलाई स्टिम सेल प्रत्यारोपण गरेर उपचार गरिएको थियो। सन् २०२० को अप्रिलमा उनले क्यान्सर मुक्त भएको घोषणा गरेकी थिइन्। त्यसपछि उनले क्यान्सरबारे चेतना फैलाउन 'द एल्लो डायरी' शिर्षकमा ब्लग लेख्न थालेकी हुन्।
सोनाली बेन्द्रे
बलिउड अभिनेत्री सोनालीलाई २०१८ मा क्यान्सर भएको पत्ता लागेको थियो। उनलाई मेटास्टेटिक क्यान्सर भएको थियो। त्यसपछि उनले अमेरिकाको न्युयोर्कमा उपचार गराएकी थिइन्।
अहिले सोनाली पूर्ण रुपमा निको भएकी छिन्। छिट्टै नै उनको अभिनय रहेको वेब सिरिज ‘ब्रोकन न्युज’मा देखा पर्दैछिन्।
मुमताज
‘रोटी’, ‘दो रास्ते’जस्ता चर्चित फिल्ममा काम गरेकी बलिउडकी चर्चित तथा सर्वप्रिय अभिनेत्री ममताजलाई पनि क्यान्सर भएको थियो। उनलाई सन् २००२ मा ब्रेस्ट क्यान्सर भएको पत्ता लागेको थियो।
५४ वर्षको उमेरमा क्यान्सरसँग जुधेकी मुमताजले लामो समयसम्म कीमोथेरेपी र रेडियसन थेरापी गराएकी थिइन्। अन्ततः उनले पनि क्यान्सरलाई पराजित गरिन्।
किरण खेर
क्यान्सरसँग जुँधेर त्यसलाई पराजित गरेकी अर्की बलिउड अभिनेत्री हुन किरण खेर। अनुपम खेरकी श्रीमतीसमेत रहेकी उनलाई सन् २०२१ मा ब्लड क्यान्सर भएको थियो। हाल भने उनको अवस्था सामान्य भइसकेको छ। एजेन्सी
