काठमाडौं- काठमाडौं चाबहिलस्थित ॐ हस्पिटल एण्ड रिसर्च सेन्टर प्रालिले सिन्धुपाल्चोक जिल्लाको बाह्रविसेमा एकदिने बृहत निःशुल्क स्वास्थ्य परीक्षण शिविर सम्पन्न गरेको छ।
अस्पतालको आफ्नो संस्थागत सामाजिक उत्तरदायित्व अन्तर्गत ॐ हस्पिटल र हरिमाया बाह्रविसे फाउण्डेशनको संयुक्त आयोजनामा बाह्रविसे प्राथमिक स्वास्थ्य सेवा केन्द्रमा संचालित शिविरमा बाह्रविसे नगरपालिकाले समेत सहकार्य गरेको थियो।
स्वास्थ्य तथा जनसंख्या मन्त्री मोहन बहादुर बस्नेतले उद्घाटन गरेको शिविरमा स्वास्थ्य परीक्षण गर्न आउने सेवाग्राहीलाई निःशुल्क स्वास्थ्य परीक्षण, उपचार तथा निःशुल्क औषधि उपलब्ध गराइएको थियो।
बाह्रविसे वरपरका ग्रामिण समुदायका स्थानीयलाई विशेषज्ञ चिकित्सकहरुद्वारा उपचार सेवा उपलब्ध गराउने उद्देश्यले ॐ अस्पतालले रेडियोलोजी, सामान्य चिकित्सा, जनरल सर्जरी, स्त्री तथा प्रसूतिरोग, मुटुरोग, छाती तथा स्वासप्रस्वास रोग, दन्तरोग, हाडजोर्नी, चर्म तथा यौनरोग, नाक कान घाँटी, स्त्री क्यान्सर परीक्षण, मनोरोग तथा फार्मेसी सेवा लगायतका विषयहरुमा ३० जना भन्दा बढी विशेषज्ञ चिकित्सक सहित शिविर सञ्चालन गरिएको हो।
ॐ हस्पिटल संचालक समितिका अध्यक्ष समेत रहेका सिनियर कन्सल्ट्यान्ट रेडियोलोजिष्ट डा आनन्द प्रसाद श्रेष्ठको नेतृत्वमा भएको स्वास्थ्य परीक्षण शिविरमा वरिष्ठ चिकित्सकहरुद्वारा स्वास्थ्य परीक्षण गरिनुका साथै अन्य अत्यावश्यकीय परीक्षण र परामर्श गर्न सकिने ब्यवस्था मिलाइएको र थप उपचारका लागि काठमाडौं स्थित ॐ हस्पिटलमा विशेष छुट समेत प्रदान गरिने बताइएको छ।
अध्यक्ष डा श्रेष्ठले सम्बोधनका क्रममा आफ्नो चिकित्सकीय सेवाको सुरुवाती दिनहरुको सम्झना गर्दै बाह्रबिसे आफ्नो दोश्रो घर सरह रहेको बताए। बाह्रविसेका स्थानीयहरु परिवारका सदस्यहरु जस्तै लाग्ने र आफु त्यस समुदायका लागि हरसम्भव सहयोग गर्न सदा तत्पर रहेको उनले बताए।
शिविरको उद्घाटन सम्बोधनका क्रममा स्वास्थ्य तथा जनसंख्या मन्त्रीले स्वास्थ्य सेवा केन्द्रमा तत्काल आवश्यक उपकरणहरु उपलव्ध गराउने र निकट भविष्यमा केन्द्रलाई १० देखी १५ शय्याको अस्पतालमा स्तरोन्नति गर्ने प्रतिव्द्धता व्यक्त गरे।
विशेष अतिथिका बाग्मती प्रदेश सभा सांसद मसिना खड्काले प्रदेशका तर्वाट बाह्रविसेका जनताको स्वास्थ्य उपचार सेवाको स्तर बृद्धिकालागि प्रदेश सरकारका तर्फवाट पनि पूर्ण साथ रहने जिकीर गरिन्। बाह्रविसे नगरपालिकाका नगर प्रमुख बालकृष्ण बस्नेतले सो स्वास्थ्य सेवा केन्द्रको उपचार सेवा विस्तार र स्तरोन्नतिका लागि नगरपालिकाको तर्फवाट पूर्ण सहयोग गर्ने प्रतिवद्धता व्यक्त गरे।
बाह्रविसे प्राथमिक स्वास्थ्य सेवा केन्द्र संचालक समितिका अध्यक्ष समेत रहेका बाह्रविसे नगरपालिका वडा नं ९ का अध्यक्ष कृष्ण बहादुर रायमाझीले अस्पतालमा थप दक्ष प्राविधिक तथा उपकरणहरुको आवश्यकता रहेको र राज्यले त्यस भेगका जनताको स्वास्थ्यको आधारशिलाका रुपमा रहेको सो सेवा केन्द्रको स्तरउन्नतिकालागि ध्यानाकर्षण गराए।
हरिमाया बाह्रबिसे फाउण्डेशनका अध्यक्ष नरेश लाल श्रेष्ठले आमाको सम्झनामा स्थापना गरिएको फाउण्डेसनले स्थानीय र वरपरका जनमानसको सेवाका लागि आयोजित स्वास्थ्य शिविरमा साथ दिएकोमा ॐ हस्पिटल परिवार र अस्पतालका अध्यक्ष डा। आननन्द प्रसाद श्रेष्ठलाई विशेष धन्यवाद दिए।
शिविरमा चर्म तथा यौन रोगमा १०१ जना, मनोरोगमा ५० जना , इसिजीमा ३९ जना, हाडजोर्नीमा २५० जना, दन्त चिकित्सा सेवामा १६० जना, सामान्य चिकित्सा, कलेजो तथा पेटरोग, छाती तथा फोक्सो र नाक कान घाँटी तथा मुटुरोगमा १०० जना, अल्ट्रासाउण्डमा १६० जना, एक्स रे सेवामा १६० जना स्त्री तथा प्रसुतीमा १८६ जना र स्त्री क्यान्सर परिक्षणमा ५० जना, बालरोग तथा शल्यक्रिया सम्बन्धी २९ जना सहित विभिन्न विधामा एक हजार भन्दा बढी विरामीले विशेषज्ञहरु सँग परामर्श तथा उपचार सेवा प्राप्त गरेका थिए।