काठमाडौं– राष्ट्रिय स्वतन्त्र पार्टीका सभापति रवि लामिछानेका सवारी चालकको उपचारको क्रममा मृत्यु भएको छ। वैशाख १० गतेको उपनिर्वाचनका लागि चुनावी प्रचारमा खटिएका बेला लामिछानेका चालक दिलबहादुर थापा (शम्भु) चितवनमा घरको छतबाट खसेर गम्भीर घाइते भएका थिए।
थापालाई उपचारका लागि ललितपुरको मेडिसिटी अस्पतालमा भर्ना गरिएको थियो। थापाको उपचारका क्रममा मंगलबार दिउँसो १:३५ बजे मृत्यु भएको मेडिसिटी अस्पताल स्रोतले जानकारी दिएको छ।
थापाको शव परिवारका सदस्यहरुले बुझिसकेका अस्पताल स्रोतले जानकारी दिएको छ।
लामिछानेको चितवनस्थित (भाडाको) निवासमा सुतेका थापा वैशाख ४ गते बिहान ४ बजे छतबाट खसेका थिए। थापासँगै रास्वपाका महामन्त्री मुकुल ढकालका सवारी चालक समेत सुतेका थिए। तर, ढकालका चालकले भने थापा छतबाट खसेकोबारे आफूलाई थाहा नभएको भनेर प्रहरीलाई बयान दिएका थिए।
प्रहरीले थापाको दुर्घटनाका सन्दर्भमा छानबिन जारी रहेको जनाएको छ। अनुसन्धानमा भएको प्रगतिबारे प्रहरीले हालसम्म कुनै विवरण सार्वजनिक गरेको छैन।
