नेपाल डेन्टल एशोसिएसनको पोखरामा भइरहेको मतदान काठमाडौं - नेपाल डेन्टल एशोसिएसनको केन्द्रीय कार्यकारिणी समितिको काठमाडौं बाहिरको चुनाव सुरु भएको छ।
दन्त चिकित्सकहरुको छाता संगठन एशोसिएसनको काठमाडौं बाहिरको चुनाव आज भएको हो। काठमाडौं बाहिर १५ वटा केन्द्रमा मतदान भइरहेको छ। बिहान ९ बजेदेखि सुरु भएको मतदान साँझ पाँच बजेसम्म हुनेछ।
एशोसिएसनको अध्यक्षमा डा प्रणय शाक्य र महासचिवमा डा विश्व प्रकाश ठाकुर निर्विरोध निर्वाचित भइसकेका छन्। उपाध्यक्षमा डा सुमन काफ्ले र डा रोशन चौधरी प्रतिस्पर्धामा छन्।
कोषाध्यक्षमा डा विधान श्रेष्ठ र डा आशुतोष शुक्ला, सहसचिवमा डा हरिप्रसाद ओली र डा शंकर श्रेष्ठ बिच प्रतिस्पर्धा भइरहेको छ। २१ सय भन्दा बढी सदस्य रहेकोा एशोसिएसनको चुनावमा काठमाडौं बाहिर ७५० जनाले मतदान गर्ने अपेक्षा छ।
बिर्तामोड, विराटनगर, धरान, जनकपुर, वीरगञ्ज, पोखरा, भरतपुर, भैरहवा, नेपालगञ्ज, धनगढी, सप्तरी, सुर्खेत, दाङ, हेटौडा र बर्दिवासमा चुनाव भइरहेको एशोसिएसनले जनाएको छ।
