म्याग्दी- वरिष्ठ हाडजोर्नी विशेषज्ञ डा गोविन्द केसीले म्याग्दीका ग्रामीण क्षेत्रमा पुगेर बिरामीको उपचार गरेका छन्।
म्याग्दीको अन्नपूर्ण गाउँपालिका–२ को भुरुङ्ग तातोपानी स्वास्थ्य चौकीमा उनले आइतवार र सोमवार हाडजोर्नी सम्बन्धी बिरामीको उपचार गरेका हुन्।
२ दिनसम्म उनले १२५ जनाको उपचार गरेका भुरुङ्ग तातोपानी स्वास्थ्य चौकीका प्रमुख कृष्ण केसीले जानकारी दिए।
आइतवार ५५ र सोमवार ७० बिरामीको उपचार गर्नुका साथै परामर्श सेवा दिएका थिए। स्वास्थ्य चौकीका प्रमुख केसीसहित सिनियर अहेब विक्रम पुन, अनमी नीता पुन, सनम वुद्धुजा पुन, अहेव चौथो संगीना मगराती लगायतले डा. केसीलाई सघाएका थिए।
चिकित्सा शिक्षाका अभियान्ता डा केसीले गत हप्ता बागलुङको निसिखोला गाउँपालिकाको बोहोरागाउँ स्वास्थ्य चौकीमा ३ दिन उपचार गरेका थिए। उनी बागलुङबाट कुनै खबर विना भुरुङ्ग तातोपानी आएका हुन्। गाउँपालिका र स्वास्थ्य चौकीले औषधिको व्यवस्थापन गरेको थियो।
‘पूर्व जानकारी विनै डा. केसी स्वास्थ्य चौकीमा आउनुभएको थियो,’ स्वास्थ्य चौकी प्रमुख केसीले भने, ‘हामी पनि अचम्ममा पर्यौं।’
स्वास्थ्य चौकीले सामाजिक सञ्जाल, महिला स्वास्थ्य स्वयंसेविका, जनप्रतिनिधि र संघसंस्थामार्फत सेवा लिनका लागि सर्वसाधारणलाई अनुरोध गरेको थियो।
दाना, नारच्याङ, भुरुङ्ग तातोपानी, घार, शिख, पाउद्धार, पोखरेबगर, ठूलोबगरका सर्वसाधारण सेवा लिन आएका थिए। फुर्सदको समयमा ग्रामीण क्षेत्रका बिरामीको उपचारका लागि आएको डा. केसीले बताए।
‘ग्रामीण क्षेत्रमा हाडजोर्नी तथा नशारोगसम्बन्धी समस्या भएका धेरै बिरामी उपचारको पहुँच बाहिर छन्,’ उनले भने, ‘फुर्सदको समयमा गाउँमै पुगेर सेवा दिने उद्देश्यले म्याग्दी आएको हुँ।’
