काठमाडौं– क्रिकेटर सन्दीप लामिछानेमाथि लागेको नाबालिग बलात्कार प्रकरणमा जिल्ला अदालत काठमाडौंले गौशाला २६ लाई परीक्षण गर्ने चिकित्सकको वकपत्र गराउन आदेश गरेको छ।
जिल्ला न्यायाधीश शंकरराज बरालको इजलासले परीक्षणमा संलग्न भएका चिकित्सकसहित ३ जनालाई वकपत्र गराउन आदेश गरेको छ। जिल्ला अदालतले खेलाडीहरु साहब आलम र अनिश श्रेष्ठको पनि वकपत्र गराउन आदेश गरेको छ।
जिल्ला अदालत काठमाडौंका सूचना अधिकारी दीपक दाहालका अनुसार तत्कालीन समयमा परीक्षण गर्ने डा बिदामा रहेको र उनको सट्टामा अर्को डाक्टरको वकपत्र गराइएको देखिएकाले पुन: वकपत्र गराउन आदेश गरेको हो ।
उक्त कुराको खुलासा बहसका क्रममा पीडित गौशाला २६ का कानुन व्यवसायीले गरेका थिए। आइतबार अन्तिम फैसलाको बहसका क्रममा उनीहरुले पीडितको परीक्षणमा संलग्न भएका चिकिकत्सकको नै बयान नलिइएको जिकिर गरेपछि न्यायाधीशले उनीहरुको बयान गराएर मात्र पेशीमा चढाउन आदेश गरेका हुन्।
नेपाली क्रिकेट टिमका पूर्व कप्तानसमेत रहेका लामिछानेलाई जोगाउने उद्देश्यले यस्तो गरेको आरोप पीडित किशोरीका कानुन व्यवसायीहरुले गरेका छन्। १८ वर्षभन्दा कम उमेरकी किशोरीमाथि करणी गरेको कसुरमा सन्दीपलाई १२ वर्ष कैद सजायको मागदाबी गरिएको छ।
सन्दीपविरुद्ध मुलुकी अपराध संहिता, २०७४ को परिच्छेद १८ को करणीसम्बन्धी कसुरको दफा २१९ को उपदफा (३) को देहाय (घ) अन्तर्गतको कसुर गरेको अभियोग लगाइएको छ।
यो कसुरअन्तर्गत १६ वर्षभन्दा बढी १८ वर्षभन्दा कम उमेरकी महिलालाई करणी गरेमा १० देखि १२ वर्षसम्म कैद सजाय हुने व्यवस्था छ। सन्दीपविरुद्ध अधिकतम १२ वर्ष जेल सजायको मागदाबी गरिएको छ।
१७ वर्षकी एक किशोरीले आफूमाथि काठमाडौंको एक होटलको ३०५ नम्बर कोठामा लगेर पटक–पटक बलात्कार गरेको भन्दै गत भदौ २१ गते प्रहरी वृत्त गौशालामा जाहेरी दिएकी थिइन्।
पीडित किशोरीले प्रहरीसँगको बयानका क्रममा सन्दीपले आफूलाई काठमाडौं र भक्तपुरको नगरकोटसमेत पुर्याएको र फेरि फर्काएर काठमाडौं ल्याई एक होटलमा राखेर बलात्कार गरेको बताएकी थिइन्।
पीडित किशोरीको बयानअनुसार भदौ ५ गते राति १२ बजेर ५५ मिनेटमा काठमाडौं महानगरपालिका–९ स्थित एक होटलको ३०५ नम्बर कोठामा राखेर सन्दीपले बलात्कार गरेको दाबी गरिएको छ।
