काठमाडौं- उपचारका क्रममा २८ महिनाकी एक बालिकाको मृत्युपछि मंगलबारदेखि हिमाल अस्पतालमा भइरहेको धर्ना दुई दिनका लागि स्थगित भएको छ। अस्पताल प्रशासन र बिरामीका आफन्तबीच उक्त घटनाका विषयमा वार्ता गर्न समिति बनाउने सहमति भएपछि दुई दिनका लागि धर्ना कार्यक्रम स्थगित भएको हो।
अस्पतालको लेटरहेडमा प्रकाशित सूचना अनुसार १३ गते ११ बजे अस्पतालमा वार्ता हुने छ। प्रहरीको रोहबारमा वार्ता हुने सूचनामा उल्लेख छ। सूचना अनुसार मृतक बालिकाको आफन्तका तर्फबाट पाँच जना, अस्पताल प्रशासन, उपचारमा संलग्न चिकित्सक र सञ्चारकर्मीसहितको वार्ता समिति बनाइएको छ। उक्त समितिले छलफलका क्रममा सहमति नभएमा धर्ना कार्यक्रम पुन:जारी हुने समेत सूचनामा उल्लेख छ।
मोरङका गंगा गौतमले आफ्नी २८ महिनाकी छोरी प्रशंशाको उपचारको क्रममा लापरबाही गरेका कारण ज्यान गएको भन्दै सो अस्पताल र त्यहाँ कार्यरत चिकित्सक डाक्टर जयदेव यादवसँग मंगलबार पत्रकार सम्मेलन गरी क्षतिपूर्ति माग गरेका थिए।
सामान्य रुघाखोकी लागेकी प्रशंशालाई उनीहरुले सो अस्पतालमा माघ २३ गते पुर्या्एका थिए। उपचारको क्रममा डाक्टर यादवले सामान्य परीक्षणसमेत नगराई औषधि चलाएको, कान्ति बाल अस्पतालमा उपचारका लागि रिफ्र लेटर पठाउँदा चिकित्सकको हस्ताक्षर र अस्पतालको स्टयाम्प समेत नभएको र अस्पतालले मेडिकले रेकर्ड समेत नदिएर आफ्नी छोरीको ज्यान गएको उनीहरुको आरोप थियो।
अन्तिम अवस्थामा बिरामी नबाँच्ने भएपछि महाराजगंजस्थित मेट्रो अस्पताल पुर्यापएका थिए। त्यहाँ पुर्यारएको दुई घण्टा पनि नबित्दै प्रशंशाको मृत्यु भएको थियो। हिमाल अस्पतालका चिकित्सक यादवकै लापरबाहीका कारण छोरीको ज्यान गएको पीडित गंगा गौतमको बुझाइ छ।
उनले रुघाखोकी र ज्वरो आएको नानीलाई अस्पतालले सामान्य परीक्षणसमेत नगराई औषधि दिएका कारण ज्यान गुमाउनुपर्ने अवस्था आएको बताए। पीडित गौतमले छोरीको उपचारमा लापरबाही गर्ने सो चिकित्सकको लाइसेन्स छानबिन गर्न नेपाल मेडिकल काउन्सिलमा पनि उजुरी पनि दिएका छन्।
गौतमले सो अस्पतालमा छोरी प्रशंशाको परीक्षण गराएका थिए। तर अस्पतालले आफूहरुको आग्रहमा पाँचौ दिन एक्स रे गरेर हेर्दा फोक्सोको ६० प्रतिशत भागमा पानी जमेको पाइएपछि चिकित्सक यावदले पीआइसीयू नभएको भन्दै कान्तिबाल अस्पतालमा रेफर गरेको मृतक बालिकाका बुवा गौतमले भने।
तर, रेफर गरिएको लेटरमा चिकित्सक यादवले आफ्नो हस्ताक्षरसमेत नगरेर लापरबाही गरेको पीडित गौतमको गु्नासो छ। पीडित गौतमले फागुन ८ गते सोमबार आफूहरुमाथि न्यायको माग गर्दै नेपाल मेडिकल काउन्सिल, नेपाल मेडिकल एशोसिएशन, जिल्ला प्रशासन कार्यालय, काठमाडौं, प्रहरी परिसर टेकुमा पनि उजुरी दिएका छन्।
