डा लोचन कार्की, अध्यक्ष, नेपाल चिकित्सक संघ
आफ्नो ज्यानको बाजी थापेर चिकित्सकहरु कोरोना संक्रमितको उपचारमा खटिइरहेका छन्। तर उल्टै उनीहरुमाथि नै विभिन्न आक्रमण तथा लाञ्छना लगाउने काम भइरहेका छन्। वीरगञ्जस्थित नारायणी अस्पतालमा चिकित्सक तथा स्वास्थ्यकर्मीमाथि भएको घटना निकै निन्दनीय छ।
विश्वका विभिन्न देशमा चिकित्सक तथा स्वास्थ्यकर्मीको मनोबल बढाउन दियो बाल्ने, ताली बजाउने जस्ता कामहरु भए। तर नेपालमा भने उल्टै ‘डाक्टर चोर देश छोड’ भनेर मनोबल घटाउने काम भइरहेका छन्। स्वास्थ्यकर्मीमाथि कुटपिट तथा आक्रमण हुँदा पनि सरकार मौन बसेको छ।
बाहिरी देशमा धेरै संख्यामा स्वास्थ्यकर्मी संक्रमित हुँदै गइरहेका छन्। त्यस्तो भयावह स्थिति हुने दिन हाम्रोमा नआउला भन्न सकिँदैन। नेपालमा पनि करिब चार सय जना स्वास्थ्यकर्मीहरु संक्रमित भएका छन्। तर सरकारले उनीहरुको कुनै मतलब गरेको छैन।
यदि सरकारले फ्रन्टलाइनमा काम गर्ने स्वास्थ्यकर्मीहरुको जिम्मा लिँदैन भने किन जोखिम मोलेर काम गर्ने? बिमाको कुरा गरेको छ तर कुनै कार्यविधि बनेको छैन। विभेदकारी भत्ताको व्यवस्था गरेको छ। यो परिस्थितिमा चिकित्सक तथा स्वास्थ्यकर्मीहरुले काम गरिरहेको छ।
सरकारले अब पनि स्वास्थ्यकर्मीको सुरक्षा र सेवा–सुविधामा ध्यान दिएन भने एक दिन यस्तो परिस्थिति आउन सक्छ, जहाँ उनीहरुले हार मानेर गिभअप गर्न सक्छन्।
कोडिभ र ननकोभिड भनेर अस्पतालहरुलाई छुट्याउनु हुँदैन। यसरी छुट्याउँदा सबैले उपचार पाउने अवस्था रहँदैन। त्यसैले सबै अस्पताल कोभिड अस्पताल हो। सबैभन्दा महत्वपूर्ण विषय भनेको जनताले आफ्नो व्यवहारमा परिवर्तन गर्न आवश्यक छ। स्वास्थ्यको संरचनामा थुप्रै कमीकमजोरी छन्। यसलाई समय अनुसार परिवर्तन गर्नुपर्छ।
अहिले पनि ७० प्रतिशत स्वास्थ्य निजी र ३० प्रतिशत सरकारले धानेको छ। तर एक्लै कोभिडलाई मैले मात्र सक्छु भनेर सरकार अघि बढिरहँदा पार लाग्ला? निजी अस्पताललाई पनि सरकारले सँगै लिएर जानुपर्छ।
(स्वास्थ्यखबरले स्वास्थ्यका विभिन्न निकायका प्रतिनिधिसँग छलफल गरेको थियो। सो छलफमा डा कार्कीले व्यक्त गरेका धारणाको सम्पादित अंश)
हेरौं भिडियो :
