नयाँ दिल्ली- भारतको राजधानी नयाँ दिल्लीमा स्वाइन फ्लूका कारण यस वर्षको सुरूदेखि आइतबारसम्म ११ जनाको मृत्य भएको दिल्लीको राज्य सरकारले जनाएको छ।
तथ्याङ्कअनुसार सन् २०१९ मा स्वाइन फ्लू प्रभावित १ हजार ११ बिरामी भेटिएकामा ११ जनाको विभिन्न अस्पतालमा उपचारका क्रममा मृत्यु भएको छ। रोगको प्रकृतिका कारण सार्वजनिक रूपमा प्रचार नगरिकन निदानको प्रयास भइरहेको एक सरकारी अस्पतालका चिकित्सकले बताएका छन्।
गत वर्ष स्वाइन फ्लूका बिरामीको सङ्ख्या २ सय ५ रहेको र २ जनाको मृत्यु भएको थियो। यस वर्ष उक्त सङ्ख्या निकै धेरै देखिएको बताइएको छ। जनवरी २९ सम्म स्वाइन फ्लूका बिरामीको सङ्ख्या ५ सय १२ रहेकोमा करिब एक हप्ताको समयमा बिरामीको सङ्ख्या दोब्बर देखिएको भारतीय सञ्चारमाध्यमहरूले जनाएका छन्।
दिल्ली सरकारले आफ्ना सबै अस्पतालमा चाहिने औषधि, खोप, तथा अन्य उपचारका सामग्रीको बेलैमा खरिद गरी स्थानीय तहमा बिरामीलाई स्वास्थ्य सेवाको कमी हुन नदिन सावधान गराइएको बताएको छ। रासस/सिन्ह्वा
