भ्यानकुभर– करिब डेढ वर्षअघि क्यानडाका स्नोबोर्डिङ खेलाडी मार्क मोरिस भ्यानकुभर अस्पतालमा अचेत अवस्थामा थिए। केही दिन कोमामा रहेका मोरिस गत मार्चमा आफ्नै भाइ क्रेगसँग स्नोबोर्डिङको सिन सुटिङ गर्ने क्रममा दुर्घटनामा परेका थिए।
दुर्घटनामा गम्भीर घाइते भएका उनको बंगारा तथा बायाँ काँध भाँचियो। फियो फुट्यो। ढाड र करङ पनि भाँचियो। साथमा उनको देब्रे फाक्सोले पनि काम गर्न छोड्यो।
घाइते मोरिस पहिलेको अवस्थामा फर्किन सक्लान् भन्ने कत्ति पनि नचिताएका उनका परिवार र प्रशंसक त्यतिबेला आश्चर्यमा परे जतिबेला उनले प्योङचाङ ओलम्पिकमा कास्य पदक जिते।
दक्षिण कोरियामा केही समयअघि भएको शीतकालीन ओलम्पिकको २३औं संस्करणमा गत शनिबार क्यानडाको विस्टलरका स्थायी बासिन्दा मोरिसले पुरुषतर्फको स्लोपस्टाइल कम्पिटिसनमा कास्य पदक प्राप्त गरेका हुन्।
सो स्पर्धामा उनकै टोलीका म्याक्स प्यारोटले रजत पदक हात पार्दा अमेरिकी रेड गेरार्डले स्वर्ण जिते। आसन्न ओलम्पिकमा क्यानडाली टोलीका लागि यी दुई पदक नै पहिलो पदक थिए। प्यारोटले आफ्नो करिअरकै पहिलो ओलम्पिक पदक हात पार्दा मोरिसको भने दोस्रो कास्य थियो।
कोमाबाट निस्केपछि बंगारा भाँच्चिएकाले बोल्न नमिलेका कारण उनले एक कागजको टुक्रामा प्रश्न लेख्दै सोधे, ‘के म फेरि स्नोबोर्ड खेल्न सक्छु?’
‘घटनापछि आजसम्म निकै कम समय मात्रै गुज्रिएको छ। तर जीतको दिनले त्यो थोरै समयलाई अर्थपूर्ण बनाइदिएको छ’, २४ वर्षीय मोरिसले भने, ‘पछिल्लो चोटबाट पार पाएदेखि अहिलेको क्षणसम्म आइपुग्दा म निकै खुशी छु, किनकि यो क्षण मेरो जिन्दगीकै विशेष क्षण हो।’
अस्पताल भर्ना र केही महिनाको प्रशिक्षणपछि मात्रै मोरिस प्योङचाङ जाने निर्णयमा पुगेका थिए। करिब १० दिनसम्मको अस्पताल बसाइका क्रममा उनको शरीरमा विभिन्न शल्यक्रिया गरिएको थियो। त्यसपछि ६ सातासम्म उनले झोलिलो पदार्थ मात्रै खाए।
यसअघिको सोची ओलम्पिकमा पनि सहभागी हुन जानुभन्दा २ साताअघि मात्रै उनको करङको हड्डि भाँच्चिएको थियो। तर, उनी प्रतियोगितामा सहभागिता जनाएर कास्य पदक नै जित्न सफल भएका थिए। सोही समयमा जस्तै यसपटक पनि आफ्नो लगन तथा आत्मविश्वासका कारण उनले पीडालाई पार लगाउन सके।
आफ्नो दुःखदायी क्षणबारे सम्झिँदै मोरिसले भने, ‘न त यताउती हलचल नै गर्नसक्थेँ। न त अरुसँग केही कुरा नै गर्नसक्थेँ। सायद मैले निकै असहज समय गुजारेको थिएँ।’
उनले थपे, ‘मलाई विश्वास नै लागेको थिएन कि, एउटा सानो मुर्खतापूर्ण गल्तीले यो सब निम्तिएको थियो। आजकल आशा गर्छु म त्यो गल्तीलाई उल्टाएर फेरि पुरानै अवस्थामा पुर्याउँ। तर, मलाई थाहा छैन, सायद यसले मलाई सशक्त तथा असल मानिस बनाउनेछ। सम्भवतः यसले मानिसहरुलाई यस्तो अवस्थाबाट कसरी पार पाउने भन्नेमा सहयोग गर्नेछ।’
मोरिस क्यानडाको विस्टलरबाट प्रतिनिधित्व गर्ने सात खोलाडीमध्ये एक हुन्। टोलीमा विस्टलरबाट म्यास प्यारोट, टेलर निकोल्सन, सेबास्टियन टोटान्ट, स्पेन्सर ओबेरियन, बु्रक भोइज्ट र लोरी ब्लोइनको सहभागिता छ।
दक्षिण कोरिया जानुअघि मोरिसले स्थानीय पिक म्यागेजिनलाई भनेका थिए, ‘यो समय निकै चाँडो आएजस्तो लागिरहेछ। यसबाट म खुसी पनि छु। राम्रो र युवा जोशले भरिएको टोलीमा पुनः फर्किन पाउनुमा आफूलाई भाग्यमानी ठानेको छु। ममा आफैंमाथि विश्वास छ र आफ्नो भूमिका निभाउन तयार छु।’
आफूलाई सन्चो भइसकेपछि परीक्षणका लागि मोरिस गत सेप्टेम्बरमा मात्रै हिउँमा फर्किएका थिए। त्यतिबेला उनी खेलमा शतप्रतिशत क्षमता देखाउन तयार नभए पनि उनको अवस्थामा आएको सुधारले राहत दिलायो।
‘अक्टोबरको अन्तिमबाट मात्रै म पूर्णतया खेल्नसक्छु भन्ने हेक्का भयो। त्यसपछि चीन पुगेँ र आफ्नो प्रशिक्षण सुरु गरेँ। सायद त्यो मेरो पागलपन थियो कि’, मोरिसले भने, ‘मैले केही व्यावसायिक खेलहरु न्युजिल्यान्डमा गएर खेल्नुथियो। मैले यसैगरी आफूलाई परिस्कृत बनाउँदै लग्नुथियो। पुरानो स्थिति सम्झिँदा प्रशिक्षणका ती क्षणहरु सहजै पार गरेकोमा आनन्दको अनुभूति हुन्छ।’
पछिल्ला ११ महिना केही मात्रामा डरलाग्दो रहेको बताउँदै उनले त्यस्तो बेला मानसिक रुपमा पनि सँगसँगै निको हुनुपर्ने आवश्यकता औंल्याए।
खेलमा कास्य पदक हात पारेपछि मोरिसले गत आइतबार अन्तवार्ता दिँदै आफ्नो खेलप्रतिको लगावलाई अनौठो लतको संज्ञा दिए।
सिओसीका पत्रकार स्कट रुसेलले गरेको ‘किन?’ भन्ने प्रश्नको जवाफमा उनले भने, ‘जब यो घटना मेरो जीवनमा घट्यो, मसँग अब केही बाँकी छ जस्तो नै लागेन। जसले मलाई साथीहरुसँग हिमालमा गरिने रमाइलो पल दिन सकोस्। सिक्ने नयाँ तरिका र मेरो क्षमतालाई बढावा दिन सकोस्। पूरा देशले हेरिरहेका बेला आफू दौडिरहन पनि नचाहेको होइन। त्यही भावनाले गर्दा लाग्यो कि, यो कहीँ पनि पाइँदैन। मात्र यो एक लत हो।’
उनी ती व्यक्तिहरुबाट पनि उत्साहित तथा प्रेरित भए जो आफ्नो दृढ संकल्पद्वारा अरुलाई प्रेरित गर्छन्। प्रफुल्ल मुद्रामा देखिएका मोरिसले भने, ‘त्यही कारण थियो, जसले मलाई अगाडि बढ्न लगातार बल दिइरह्यो। त्यही कारण थियो, जसले मेरो जीवनको चक्रलाई घुमाइदियो।’
मोरिस जारी ओलम्पिकमा आगामी फेबु्रअरी २३ र २४ मा हुने अर्को विशेष स्पर्धामा सामेल हुँदैछन्। सो खेलमा प्रयोग गरिने तरिकाहरु बंगारा झार्ने तथा हेर्नका लागि रमाइलो हुने किसिमको रहने मोरिसले बताए।
‘खेलाडीहरुले मानव शरीरले कतिसम्म गर्नसक्छ भन्ने सीमालाई नाघ्न खाज्नेछन्। यो वास्तवमै प्योङचाङका लागि निकै रोचक तथा गज्जबको सुरुवात हुनेछ’, उनले भने।
(लेखनः टाइम्स कोलोनिस्टका लागि मार्था पर्किन्स)
अनुवादः विमर्श कँडेल
