त्रिशूली– नुवाकोटको विदुर नगरपालिकाले अवकाश पाएका ३० महिला स्वास्थ्य स्वयंसेविकालाई जनही रु. एक लाखसहित सम्मान गरेको छ।
साठी वर्ष उमेर पूरा भएका ३० स्वयंसेविकालाई विदाइका क्रममा तोकिएको अवधिसम्म सेवा पुर्याएको भन्दै नगदसहित सम्मान गरिएको नगरप्रमुख राजन श्रेष्ठले जानकारी दिए। उनका अनुसार गत असार ९को कार्यपालिका बैठकले प्रस्ताव गरेअनुसार असार १०मा सम्पन्न नगरसभामा पारित गराई यसअघि खाली हात विदाइ हुँदै आएका स्वयंसेविकालाई एक लाख उपलब्ध गराइएको हो।
‘नगरसभाबाट पारित कानुनअनुसार नगरभित्र कार्यरत स्वास्थ्य स्वयंसेविका अवकाश हुँदा तोकिएको अवधि पूरा भएकालाई नगदसहित सम्मान गर्ने कानुन बनाएर यस आर्थिक वर्षदेखि सुरु गरेका छौँ', नगरप्रमुख श्रेष्ठले भने, ‘२९ जनालाई अवकाश प्राप्त र एक जनालाई मरणोपरान्त सम्मानका क्रममा एक लाख उपलब्ध गराइएको हो।’
नगरपालिकाले बनाएको कानुनअनुसार १० वर्षदेखि १५ वर्ष सेवा गरेबापत् ५० हजार, १५ वर्षदेखि २० वर्षसम्म सेवा गरेबापत् ७५ हजार र २० वर्षभन्दा बढी सेवा पुर्याएवापत् एक लाख दिइने उल्लेख छ।
कानुनअनुसार यो आर्थिक वर्षको हालसम्म ६० वर्ष उमेर पूरा गरेर सम्मान पाउने स्वास्थ्य स्वयंसेविकाको सङ्ख्या ३० पुगेको नगरपालिकाका जनस्वास्थ्य निरीक्षक रामराजा भण्डारीले जानकारी दिए।
उनका अनुसार जनताको घरघरमा पुगेर स्वयंसेविकाका रुपमा सेवा पुर्याउँदै आएकालाई राज्यको सेवासुविधाबाट अति न्यूनतम मात्र पाउँदै आएका स्वयंसेविकालाई गरिएको सम्मानले उत्साहित बनाएको छ।
विभिन्न तहमा रहेका सरकारले सञ्चालन गर्दै आइरहेको स्वास्थ्य कार्यक्रमलाई जनताको घरघरमा पुर्याउने स्वास्थ्य स्वयंसेविकाले काम गरेको दिन न्यूनतम पारिश्रमिक मात्रै पाउने गरेका छन्।
यसअघि अवकासको समयमा संघीय सरकारबाट २० हजार र प्रदेश सरकारबाट ५ हजार उपलब्ध गराइँदै आएकामा विदुर नगरपालिकाको निर्णयले ठूलो राहत पुगेको छ।
