काठमाडौं- भारतमा कोरोना भाइरसबाट पछिल्लो एक दिनमा थप दुई हजार जना संक्रमित भएका छन्। सरकारी अधिकारीहरुले बुधबार दिएको जानकारीअनुसार पछिल्लो २४ घण्टामा भारतमा दुई हजार ६७ जना संक्रमित भएका हुन्।
संघीय स्वास्थ्य मन्त्रालयले अघिल्लो दिन भन्दा ८२० जना बढी संक्रमित देखिएको जनाएको छ। मंगलबार सार्वजनिक गरिएको विवरणमा एक हजार २४७ जना कोरोना भाइरसबाट संक्रमित भएको उल्लेख थियो। भारतमा अहिले १२ हजार ३४० जना कोरोना भाइरसका सक्रिय संक्रमितहरु रहेका अधिकारीहरुले जनाएका छन्। पछिल्लो २४ घण्टामा एक हजार ५४७ जना कोरोना भाइरसबाट संक्रमणमुक्त भएको मन्त्रालयले जनाएको छ।
महामारी सुरु भएदेखि अहिलेसम्म कुल चार करोड २५ लाख १३ हजार २४८ जना संक्रमणमुक्त भएका छन्। त्यसैगरी कोरोनाका कारण अहिलेसम्म भारतमा पाँच लाख २२ हजार छ जनाको मृत्यु भएको छ। ती मध्ये ४० जनाको पछिल्लो एक दिनमा मृत्यु भएको हो।
